General Santos City—gikabutyag karon ni PSI Davis Dulawan, hepe sa Police Station 5 nga sa kasamtangan gipaabot pa nila ang resulta sa gihimong eksaminasyon sa SOCO sa patay nga lawas sa biktima nga si Alias Jessa Mae, 22, waitress ug nanimuyo sa Prk. San Juan Barangay Calumpang ning syudad human nga nakita nalang kining wala nay kinabuhi sulod sa usa ka lawak sa Nicole Video k Bar nga nahimutang sa Prk. Stella Mariz Brgy. Tambler.
Sumala pa ni PSI Dulawan nga sa karon wala pa nila masuta unsay gikamatyan sa biktima tungod kay wala silay nakit-ang samad sa lawas sa nasangpit gawas nalang sa dugo nga niagas sa iyahang ilong.
Nag-unang suspect sa kapulisan sa kamatayon sa biktima ang lalaking ulahing nakauban niini sulod sa lawak nga si Alvin Ruta, kansa dili mibiya sa lugar ayha nakaplagan ang patayng lawas sa biktima.
Sa karon ginahuwat pa sa awtoridad ang resulta sa gihimong pagsuta sa SOCO ug kung mapamatud-an nga gituyo kini ug patay, ilang pasakaan ug kaso ang suspek pinaagi sa regular filing.
Kahinumduman nga nakita nalang nga wala nay kinabuhi ang biktima alas 12:00 sa tungang ug wala nay sul-ob nga sapot , una na kining gikontrata sa suspect nga makighilkawas sulod sa lawak sa maong bar.(Dave Silagan)
