General Santos City–Ginahikay na ang kasong adminsitratibo nga atubangon ni PO2 Ernie Sagabay nga nakabase sa Regional Mobile Force Batallion, human kining nadakpan nga nagdala ug walay lisensyang armas sa gihimong ronda sa kapulisan sa Polomolok niadtong nakalabayng adlaw.
Sumala kang Police Chief Superintendent Marcelo Morales, Regional Director sa Police Regional Office-12 nga gawas sa administratibo, napasakaan na ug kasong kriminal si Sagabay.
Pagpaklaro ni Chief Superintendent Morales nga hugot gyud nga ginabawal sa tanang miyembro sa kapulisan ang pagdala ug mga armas nga walay lisensya hilabi na kung kini mga personal nilang gipanag-iyahan.
Dugang pamahayag ni Director Morales nga usa si PO2 Sagabay sa ilahang mga ginamonitor nga pulis nga posibleng lambigit sa illegal nga droga.
Pagpaklaro niya nga wala sila naga-undang sa kampanya batok illegal nga droga ingon man ang pagpahigayon ug internal cleansing.Dili lang matud pa sa mga personahe sa kapulisan militar ug uban pang Law Enforcement Unit kon dili sa tanang mga empleyado sa gobyerno. (Lore Romualdo)
