South Cotabato—Nag atubang ug kaso ang tulo ka mga opisyal sa militar ug tulo ka Barangay officials sa South Cotabato human nga gikasuhan sa National Union of People’s Lawyer (NULP) ngadto sa Department of Justice gumikan sa maduguong engkwentro sa Lake Sebu niadtong Disyembre 3, 2017.
Mga gikasuhan mao silang si Major General Noel Clement, commander sa 10th Infantry Division, Lt. Col. Harold Cabunoc, commanding officer sa 33rd Infantry Battalion ug Lt. Col. Benjamin Leander, kanhing commander sa 27th Infantry Battalion.
Apil sa mga gikasuhan silang si Barangay Captain Bebot Nobleta, Kagawad Melencio Tungkay ug IPMR Arturo Labi, pulos mga opisyal sa Barangay Ned, Lake Sebu, South Cotabato.
Nasayran nga 7 counts sa kasong murder ug 2 counts sa kasong frustrated murder ang gipasang-at sa grupong NULP ngadto sa DOJ batok sa mga nasangpit nga opisyal.
Kahinumduman nga nahitabo ang engkwentro tali sa tropa sa militar ug gituohang supporter sa armadong grupo sa Barangay Ned nga gikamatay sa pito ka mga lumad ug pagkaangol sa duha pa niadtong nakalabyang tuig.
