Nakig-coordinate karon sa City health Office si City Councilor Maria Lourdes Gaane nga Chairman sa Committee on health sa konseho aron ilang imbestigahan ang Borj Tuna atbp nga eat all you can restaurant nga naa sa Tiano-Del Pilar ning syudad sa Cagayan de Oro.
Kini tungod sa alledge food poisoning nga nahitabo sa dili mominus napulo ka mga kustomer sa maong restaurant niadtong Domingo.
Matud ni Gaane nga ang iyang Committee on health sa City Council, nakig-coordinate ni City health officer Dra. Fe Bongas aron ilang susihon unsay rason nga nagsakit ang mga tiyan ug nagkalibanga ang mga kustomer sa maong restaurant.
Lakip sa biktima nga mipa-blotter sa Divisoria Police Station ang usa ka Julius Jemeniro, 47 anyos, minyo nga taga 18th st., Barangay Nazareth ning syudad.
Sa iyang report sa Divisoria Police Station, gibutyag ni Jemeniro nga alas 12 sa udto niadtong Lunes June 24, mikaon sila sa ilang paniudto sa BORJ Tuna atbp. restaurant uban sa iyang misis nga si Gerimille Jemeniro, 45 anyos ug ilang anak nga si James Earl Jemenito, 14 anyos.
Matud ni Jemeniro nga sa pag-abot sa mga ala una sa hapon sa maong adlaw, nagsakit na ang iyang tiyan lakip ang tiyan sa iyang asawa ug iyang anak.
Gibutyag ni Jemeniro nga didto sa BORJ Tuna atbp., nagkaon sila ug SEA foods, Chicken, Dessert nga water melon ug pinya.
Matud ni Jemeniro nga tungod sa sakit sa ilang tiyan, pagsuka ug kalibanga nagdala sila sa Polymedic Hospital.
Gibutyag ni Konsehal Gaane nga ilang gusto masusi uban sa mga health officials kon unsay rason nga nagsakit ang tiyan ug nagkalibanga ang mga customers sa maong restaurant.
Sa iyang kabahin. gipahayag ni Dra. Fe Bongas nga hepe sa City health Office nga ila karon nga gisusi ang lain laing mga hospital aron pagkuha sa record kon unsay gibati nga sakit sa mga pasyenting nakaka-on sa BORJ tuna Restaurant.
Matud ni Dra. Bongas nga ilang gi-imbistigahan ang maong insidente bisan wala pay written complaint nga ilang nadawat sa City Health Office.
Gidugang ni Bongas nga iya na lamang nasayran ang maong insidente sa media busa nga ilang gihimo ang ilang daling pakisusi aron masuta unsay hinungdan sa maong sakit.
