Giklaro sa Calinan Police Station ubay-ubay nga personahe ang miresponde sa komosyon sa Lacson

Davao City – Ubay-ubay ka mga sakop sa kapulisan ug dili lang tulo ka personahe ang miresponde sa nahitabong komosyon sa Purok 4, Lower Brgy. Lacson, Calinan District, Davao City, human namatay ang duha ka pulis sa Calinan Police Station niadtong July 26, 2023.

Sa interbyu sa DXDC RMN Davao kang Police Major Ricky Obenza, Station Commander sa Calinan Police Station gibutyag niini, human nakadawat og impormasyon ang buhatan nga dunay pangayaw, rason nga daling miresponde ang Calinan Police Station, Los Amigos Police Station, Baguio Police Station, SWAT Team, City Mobile Forces Company (CMFC), 27th IB Philippine Army ug Task Force Davao.

Giklaro ni Obenza, dili pagpangayaw ang nahitabo sa Brgy. Lacson, usa lang ka komosyon sa usa ka pamilya sa Tribung Matigsalog.

“Actually, ang pagtawag sa radio tanan nag react kay mali man gud nga information ang nikalat nga pangayaw, pati sa radio mao to ang balita tanan PNP Forces nag react gyud”, sulti ni Obenza.

Kahinumduman, duha ka pulis ang gipangtigbas patay kansang igo lang miresponde sa maong kagubot nga sila PCpl Mark Anthony Corsino ug PSMS Tito Lague, samtang angol usab sila PCpl Ken Leo Gumanoy ug mobile patrol driver nga si Donald Ombrete.

RadyoMaN Don Pulayao