Nagpadayon pa ang gihimung imbistigasyon sa City Tourism Office sa dakbayan sa Butuan kung unsay hinungdan nganong gilangaw ang gipahigayong Tourism Symposium niadtong nakalabyang Domingo, subay sa ika 498 komemorasyon sa selebrasyon sa Unang Misa sa Pilipinas.
Sigun ni May Diez, sa City Public Information Office nga nagpadala na ug sulat si City Tourism Officer Evangelyn Dominise ngadto sa buhatan ni Mayor Ronnievic Lagnada aron ipahibalo nga naglusad sila ug internal investigation sa maong hitabo.
Kahibaloan nga nagpareserba ug 300 ka lingkuranan ang City Tourism Office didto sa Grand Palace apan 16 lamang ka mga partisipanti ang mitambong.
Human nibuto ang nasanpit nga balita, nipaabot ug impormasyon ang mga Konsehal sa dakbayan sa Butuan nga wala sila ma-imbitahan sa maong okasyon.
Apan sigun ni Diez, nakatambong pa sa Santos nga Misa ang pipila ka mga Konsehal mao’ng imposible nga wala sila ma-imbitar sa sunod nga programa ang Symposium sa Hotel.
Giklaru sa taga City Tourism Office nga maoy gitahasan sa imbitasyon sa mga partisipanti gikan sa Department of Education si Mr. Renato Latore, maong angayan usab nga moklaro niini nga isyu ang gitumbok nga opisyal sa DEPED.
Dugtong sa maong balita…
Mitubag si Mr. Renato Latore, ang Education Supervisor sa Araling Panlipunan sa DEPED Butuan City Division, sa isyu nga siya ang gibasul sa taga City Tourism Office nganong gilangaw ang Tourism Symposium niadtong nakalabyang Domingo sa Grand Palace Hotel.
Sa interview sa RMN DXBC Butuan, giangkon ni Mr. Latore nga siya ang gitahasan sa pag-imbitar sa 198 ka mga partisipanti gikan sa Department of Education (DEPED) Butuan city Division nga mga magtutudlo sa Araling Panlipunan.
Gilayon siyang nagpagawas ug advisory sa tanang mga magtutudlo ug nagpadala usab siya ug mensahe sa group chat sa messenger isip pagpahinumdum sa pagtambong sa nasangpit nga aktibidad.
Dugang sa opisyal nga wala siya magkulang sa iyang tahas sa pag-imbitar sa mga partisipanti gikan sa DEPED apan wala siya’y kasayuran kung unsay rason sa wala pagtunga sa iyang gipang-imbitar.
Tungod niini nagpagawas siya ug direktiba nga kinahanglan mo-esplikar ang mga magtutudlo sa wala nila pagtambong ug kung kinahanglan sila manubag angayan lang kining ipatuman.
Ang OIC City Tourism Officer Evangeline Dominese nag sulat kini sa Mayor arun ipasabot ang hitabo.
[image: firstmass symposium 2.jpg]
