TACLOBAN CITY – Nakit-an nga patay na an gin-aaligar hitman ni self-confessed drug lord Rolando “Kerwin” Espinosa Jr. ngan asawa hini ha sakob han ira rest house ha Brgy. Talisayan, Albuera, Leyte., dida han huwebes.
An lawas ni Jesus Tulin in nakit-an ha second floor han two-story house samtang an asawa hini nga hi Sunshine in nakit-an nga patay na ha ground floor.
An mag-asawa in nagserbe nga caretakers ha rest house nga gintatag-iyahan ni Ronnie Allosa, usa nga contractor.
Narekober ha crime scene an usa nga .45 caliber pistol nga may sulod nga lima nga bala.
Sumala kan PSInsp. Salvador Apacible, Chief Of Police han Albuera, Leyte, an nasabi nga rest house in gin-aayad ngan 3 kilometers la an kahirayo tikang ha police station.
Sumala han construction worker, unom nga kalalakin-an an sumakob ha nasabi nga rest house samtang hira in nagtatrabaho.
Tulo ha unom nga sumakob in nanutok hin pusil ha mga construction workers ngan ginpayuko ha tuna.
Syahan daw nga ginpatay hi Sunshine ngan sumunod hi Jesus nga nagpipintura hadto nga mga oras.
Dugang ha pamahayag ni PCInsp. Apicable, hi Jesus in hitman han mga Espinosa ha mga drug operations ha Sinirangan Bisayas.
May mga nagpasaka hin kaso hadi kontra kan Jesus pero nadissmiss tungod nga nagwithdraw an mga complainants kay nahadlok para ha ira kinabuhi.
Nagpasaka naman hin attempted murder nga kaso an Albuera Police ha Prosecutor’s Office ha Baybay City, Leyte kontra kan Jesus tungod han gin-aaligar pagpusil ha usa nga businesswoman dida han Marso.
Photo by: Robert Dejon
