BACOLOD CITY – Nagdagon dagon padulong sa Police Station 1 ang isa ka 45 anyos nga lalaki agud ipa record nga ginsulod sang kawatan ang iya gin-arkilahan nga kwarto sa isa ka pension house kag ginkuha ang kapin P20 mil pesos nga balor sang cellphone kag cash.
Suno sa tag-reklamo nga si Carlo Arguelles, kasado kag tumandok sang Molo, Iloilo nga sadtong Martes, October 2 may mga las 9:45 sang gab-i ini siya ang yara sa isa ka room sang isa ka pension house sa dalan Rosario sa Barangay 32.
Sa iya pagbugtaw, nadiskubrehan sini nga bukas na ang pwertahan sang kwarto kag wala na ang iya cellphone nga nagabalor sang kapin P18 mil pesos subong man kwarta nga cash nga kapin sa P2,600 lakip na ang USB nga nadula man.
Nagapati ang biktima nga ginsulod sang wala makilala nga suspek ang iya kwarto kag gin-kawat ang iya kwarta kag cellphone.
Bangud sini, nagpadulong sa Police Station 1 kahapon sang aga ang biktima agud ipa-blotter ang natbo sa iya./dyHB BACOLOD
