Nagaangot pa ang kutsilyo sa likod sang 14 anyos nga lalaki sang gindala sa Western Visayas Medical Center matapos nabun-an sa Brgy. Katilingban, Molo kaina sang kaagahon, Disyembre 25, 2018.
Ginpahayag ni PO2 Frexie Dionisio sang Molo PNP nga base sa ila imbestigasyon, nagalakat sa dalan ang biktima nga si Alyas Rey upod ang duha pa ka menor de edad sang ila nasugata ang indi magnubo sa 15 ka mga lalaki.
Hinali lang nga ginkastigo sang mga suspek ang mga biktima kag nagresulta sa pagkabuno kay alyas Rey sang Delgado St., City Proper.
Posible suno kay Dionisio nga gin-trippingan ang mga biktima bangud naka-inom ang mga suspek base man sa panaysayon sang upod ni Rey.
Padayon nga ginabulong sa hospital si Rey samtang ginapangita na sang mga katapo sang Molo PNP ang mga suspek nga gilayon nakapalagyo matapos ang insidente.
