San Enrique, Iloilo – Patay ang 1st year criminology student nga si Eric Cortes, 19 anyos sang Brgy. Aglalana, Passi City matapos ginbuno sa plaza sang San Enrique, Iloilo alas 11:00 kagab-i, Disyembre 19, 2018.
Suno kay PSI Fernando Punzalan Jr., hepe sang San Enrique Municipal Police Station, nagapamahaw lang sa plaza ang biktima upod ang iya grupo pagkatapos sang programa nga ginhiwat sa banwa.
Apang nag-abot ang grupo sang mga suspek nga naka-inom kag hinali lang ginsulong ang grupo ni Cortes.
Suno kay Punzalan, napuruhan gid si Cortes kag nakaagum sang patal nga pilas sa wala nga dughan kag likod nga gintunaan sang iya kamatayon.
Posible suno kay Punzalan nga natripingan lang ang biktima.
Nadakpan naman ang mga suspek nga positibo nga ginkilala sang mga nakakita sa nagluntad nga insidente.
Ginkilala ang mga suspek nga sanday Robert Villacampa, 18 anyos; Anthony Denaja, 19 anyos ;Louie Jay Cerbo, 20 anyos; Joseph Lara, 34 anyos ; kag Guilbert Peñaflor, 36 anyos, lunsay mga residente sang Barangay Campo, San Enrique.
