Naglab-ot sa ginabulubanta P100,000 nga kantidad sang shabu kag marijuana ang nakumpiskar sang kapulisan sa ginpatigayon nga drug buy bust operation pasado alas dose sang kaudtuhon subong nga adlaw sa Rizal Extension, Barangay Zone, Koronadal City sa pagpanguna sang City Drug Enforcement Unit (CDEU) sang Koronadal City Police Station kag City Anti Drug Abusse Council ukon CADAC sa pagpanguna ni Dr. Glorio Sandig.
Gindakop suno pa ang suspek nga ginkilala kay Prince Rainier Cabangal Ga, 25anyos, soltero kag residente sang Purok Gracia Villa, Barangay Zone 1, Koronadal City matapos makuha sa iya possession ang nagkalain-lain nga pakete sang ginasuspetsahan shabu, dahon sang marijuana kag drug paraphernalia sa sulod sang SKYE Pension House, Brgy Zone 4 sa nasambit nga syudad.
Gilayon naman nga gindala ang suspek lakip na ang nakuha nga item sa Koronadal City Police Station para sa nagakaigo nga disposasyon sa kaso nga pagbayolar sa Article 2, Section 5 sang R.A. 9165 nga igasang-at sa korte.
Sa interview sang RMN Koronadal kay CADAC Action officer Dr. Glorio Sandig madugay na nila nga ginamonitor ang nasambit nga suspek makaligad nga nagpalab-ot ang Barangay Opisyal sang Zone 1 bahin sa kalakaran sang suspek sa ila lugar.
