General Santos City–Nagpatabang sa Police Station 1 ang usa ka ginang nga si Madeline Saban, hamtong ug nanimuyo sa Alerta St. Cor. Chico, Barangay Dadingas, North, Gensan human nga nasayran matud pa niini nga gikawatan ang ilahang panimalay.
Sumala pa niini nga alas 4:44 ang takna sa buntag nakadawat kini ug tawag gikan sa Dxmd Rmn Gensan human nga nakita matud pa sa duha ka mga concern citizen ang bag niini ug mga ID sa dalan nga nagkalat hinungdan nga gireport sa RMN.
Gikabutyag sa biktima nga nakurat nalang kini human nadawat ang maong tawag ug pagsuta sa iyahang bag wala na kini sa iyahang kiliran. Unod sa bag ang 100,000 pesos nga cash.
Didto usab nila nasuta nga guba ang bintana sa balay sa mga nahisgutan kansa gituohan nga maoy giagian sa kawatan. Samtang nabilin usab sa lugar ang usa ka tsenelas sa suspek.
Sa kasamtangan padayon pang gi-imbistigahan sa Police Station 1 ang maong panghitabo ug gisuta ang posibleng kuha sa CCTV sa maong area. (Dave Silagan)
