Sa di pa mo-post sa Facebook o sa laing sa social media site, kinahanglang huna-hunaon sa makadaghan kung di ba mabulilyaso sa imong post.
Sama niining usa ka ginang sa lungsod sa Dauis sa lalawigan sa Bohol nga gikiha ug cyber libel sa usa ka babaye nga iyang ginganlan ug di mao diha sa Facebook sa pagduda nga duna kini relasyon tali sa iyang bana nga seaman.
Natanggong sa Dauis Police Station sa Bohol human nadakpan sa Regional Anti-Cyber Crfime Group 7 si Marjorie Talinda nga taga Barangay San Pedro human siya gikiha usa ka babaye nga gipasanginlan niyang gikarelasyon sa iyang bana.
Nireklamo ang maong babaye human nakita niya ang iyang hulagway sa FB diin kauban ang bana ni Talinda nga ginganlan na siya ug “baboy”, “pokpok”, ug uban pa.
Si Chief Inspectot Leo Dofiles pangu sa Anti Cybercrime Group nitambag sa publiko nga kung adunay kasuko batok sa usa ka tawo likayan ang paghingan o pagpakauwaw niini diha sa social media, inay moderetso na lang ug pasaka ug kaso , tungod kay mahimo kining mapasakaan ug online libel.
