South Cotabato–Luwas na sa makuyaw nga kahimtang samtang nagpaalim sa balay tambalanan ang biktimang si Angelou Peligrino, 23 anyos, kansa natigbasan sa iyang kapuyo nga si Joey Magon Jr., 28 anyos, nga susamang nanimuyo sa Purok Pag-Asa, Barangay Lambayong, Tampakan, South Cotabato.
Sumala pa ni Police Major Joseph Forro II ang labaw sa Tampakan Municipal Police Station nga gikasuko sa suspek dihang wala nakaluto ug panihapon ang kapuyo niini gumikan kay nagdula ug computer samtang wala pa nakakaon ang ilang upat ka mga anak.
Gumikan usab sa kagutom sa suspek kalit matud pang nawad-an sa iyang panghuna-huna hinungdan nga iyahang natigbasan ang kapuyo niini igo sa aping nga bahin sa nawung.
Saysay man usab ni Forro nga gikan matud pa ang mga nasampit nagtambong sa usa ka selebrasyon sa lugar sa wala pa mahitabo ang insidente ug naglalis kini sa ilang pagpamauli sa ilang panimalay.
Pagpaklaro usab sa opisyal nga dili nalang mopasaka ug kso ang biktima ngadto sa iyang kapuyo gumikan kay mipatigbabaw ang gugma ug kaluoy sa biktima. (Reynald Timario)
