Nagapadayon suno kay Provincial Disaster Risk Reduction and Management Officer in charge Rolly Aquino ang ginapatigayon nila nga disinfection sa mga public places dire sa probinsya kag pagspray sa tire sang mga salakyan subong man ang pagtapak sang katawhan sa foot bath bilang kabahin sang precautionary measure batok coronavirus disease ukon COVID-19 tungod wala man suno pa ini ginadumilian sang Department of Health.
Ginkumpirmar man ni Aquino nga ang disinfectant nga ginagamit nila sa spraying ang aprobado sang Food and Drug Administration ukon FDA.
Samtang suno kay Aquino ang gin-untat lang nila ang pagpatigayon sang misting nga direkta sa tawo matapos nga wala ini ginarekomendar sang Department of Health tungod sa malain nga epekto sini sa ikaayong lawas.
Nahibaluan nga ginpahayag sang DOH nga wala nila ginarekomendar ang spraying ukon misting batok COVID-19 tungod wala sang ebidensya nga makapatay ini sa virus kundi makatuga ini sang skin irritation, asthma kag environmental pollution kag iban pa.
