General Santos City—Nagpadayon pa ang ginahimong assessment sa PDRRMO South Cotabato ngadto sa mga naapektuhan sa pag-igo sa buhawi sa pipila ka lugar sa probinsya niadtong adlawng Sabado, July 28, 2018.
Sumala ni Mela Lorca, PDRRMO Action Officer sa South Cotabato sa pakighinabi sa RMN Gensan News Team nga apektado ang pipila ka mga barangay sa Koronadal, Sto. Nino, Tantangan ug Polomolok.
Sa karon dili pa nila masulti pila gyud ang damyos sa pag igo sa maong kalamidad tungod nagpadayon pa ang ilang pagsuta.
Ginahuwat pa usab nila ang report sa CDRRMO sa Koronadal City ug MDRRMO sa mga lungsod nga apektado.
Samtang gikumperma usab ni Lorca nga balik normal na ang supply sa kuryenti sa Koronadal sa kasamtangan.
Nasayran nga pipila ka barangay sa maong syudad ang nawad-an ug supply kuryenti sukad Sabado sa hapon hangtud kaganinang buntag human natumbahan ug punuan sa kahoy ang pipila ka poste nga iyaha sa SOCOTECO 1 human mihapak ang kusog nga hangin dungan sa pagbundak sa ulan.
