Ginbasura sang Sandiganbayan ang apelar ni anay Mayor kag karon Congressman Jerry Trenas nga i-dismiss ang kaso nga graft batuk sa iya angut sa gina-alegar mis-use sang 500,000 pesos nga priority development assistance fund ukon PDAF ni Senador Loren Legarda bilang financial assistance sa Iloilo Press Club (IPC) sang 2003.
Sa resolusyon sang Sandiganbayan 7th Division nga napetsahan Enero 28, 2019, ginbasura sini ang apelar ni Trenas bangud sa kakulang sang merito.
Nahibaluan nga sa iya motion, ginpanindugan ni Trenas nga wala sang balasehan nga kabigon nga illegal, irregular, unnecessary kag extravagant ang pag-isyu sang financial assistance gikan sa PDAF ni Senador Legarda bangud wala man sang notice of disallowance.
Suno sa iya nga napaslawan ang prosecution nga pamatud-an nga ginpaboran niya ang IPC ikumparar sa iban nga beneficiary bangud si Legarda mismo ang nagapili sang proyekto kag amo man ang may deber magpili sang benepisyaryo sang proyekto.
Ginpanindugan naman sang state prosecutors nga ang argumento ni Trenas ang evidentiary matters nga wala pa napamatud-an.
