CAPIZ – Nakabaton sang ayuda nagikan sa Capiz Provincial Government ang pamilya Celino nga napatyan sang tatlo nila ka himata matapos ginpanglabo sa Sitio Dulunan, Barangay Tanza Norte, Panay, Capiz sadtong Agosto 29, sa sini na tuig. Nagpadulong personal si Mr. Pepe del Rosario, Executive Assistant to the office of the Governor kag Aksyon Agad Community Affairs head sa poluy-an sang pamilya Celino kag Labto. Nagdangup sa talatapan ni del Rosario ang nasambit nga pamilya agud sa pagpangayo sang bulig.
Naghatag sang libre nga burial package program sa tatlo ka mga napatay humalin sa pag-embalsamo, lungon kag lubong ang gobyerno samtang P10,000 nga kantidad naman ang ginhatag sa pamilya sang isa pa ka biktima nga menor de edad nga napatay samtang ginabulong sa ospital. Magluwas sa amo nga bulig, ginhatagan man sang financial assistance sang gobyerno ang pamilya sang isa pa gid ka biktima nga padayon pa karon nga ginabulong sa ospital.
Ginpahayag ni Mr. Pepe del Rosario nga nagbatyag ini sang kaluoy sang makita sini ang sitwasyon sang amay nga nagapangsubo matapos nadulaan sang asawa kag apat ka tuig nga anak. Nahibaluan nga isa sa mga prayoridad sang Capiz Provincial Government sa idalom sang administrasyon ni Governor Antonio del Rosario ang social services sa mga nagakinahanglan sang financial assistance para sa burial kag hospitalization.
