BACOLOD CITY – Ginbuno sang wala makilala nga mga lamharon nga suspek ang isa ka soltero may mg alas 12:45 kaina sang kaagahon sa Mansilingan-Murcia Road, Brgy. Mansilingan, Bacolod City.
Nakilala ang biktima nga si Benjie Fegidero, 23 anyos ang edad pumuluyo sang Purok Kapisan, Brgy. Vista Alegre, Bacolod City.
Suno sa hepe sang Police Station 7 nga si Police S/Insp. Ramel Sarona nga ang biktima ang ginbuno sang mga suspek nga naga-edad halin 18 tubtub 19 anyos, tanan nagasoksok sang itom nga jacket kag camouflage nga shorts.
Ang biktima nag-angkon sang isa ka pilas tuga sang pagbuno sa wala nga portion sang iya likod gamit naman ang wala natumod nga kutsilyo.
Gindala sa Corazon Locsion Montelibano Memorial Regional Hospital ang biktima, samtang gilayon naman nga nagpalagyo ang mga suspek.
