Roxas City, Capiz -Nagahilibi-on kag nagakiang-kiang nga nagpadulong sa Roxas City Police Station kaina sang kaagahon ang isa ka Guest Relation Officer (GRO) sang isa ka KTV bar sa Legaspi St., Roxas City.
Ginkilala ang amo nga GRO sa kay Sandra 18 anyos sang Brgy. Mansilingan, Bacolod City. Gintuad ni Sandra sa mga kapulisan nga ginsakit ini sang kaupod man sini sa trabaho nga si certain May. Suno pa diri nga nag-ugat ang insidente sang indi na magbayad ang iya kustomer nga gina-alegar isa ka tomboy sang iya ginsukot, apang hinali nga nagpasilabot ang kaupod sini nga GRO.
Bangud yara man sa impluwensya sang makahulubog nga ilimnon si May ginhangkat sini si Sandra nga magbato sa iya. Gilayon nga gindumog kag ginkagat ni May si Sandra sa iya nawala nga kamot. Nag-angkon pa gid ini sang pilas sa tiil bangud nakatapak ini sang buka nga botelya sang ilimnon sang sila ang nagadumugay.
Ginapanindugan ni Sandra nga kinahanglan nga magbayad ang iya kustomer, bangud kun indi, siya ang magabayad sa mga gin-inum sang iya kustomer rasun nga nagpalab-ot ini sang reklamo sa pulis.
