Ginpasakaan na sang kaso nga rape ang 25-anyos nga lalaki nga gintudlo naghimulos sa 24 anyos nga babaye sa banwa sang Leganes, Iloilo.
Ini matapos natigayon nga madakpan sang mga pulis sa follow up operation ang suspek nga si alyas Toto nga isa ka mekaniko.
Ginpahayag nga sang Pebrero 3, Sabado nga adlaw, ginhagad sang iya abyan nga lalaki ang biktima nga si alyas “Neneng” nga mag-inum inum sa isa ka shop sa banwa sang Leganes upod sa apat pa ka mga lalaki nga indi sini kilala.
Manug-alas onse na sang gab-i sang magsulod sa hayub-hayub ang biktima nga tuman na ka hubog kon sa diin daku ang kakibot sini sang nagsulod man ang suspek kag ini siya ang ginhimsulan.
Naluwas lamang ang biktima sang mag-abot ang iya abyan samtang madasig naman nga nagpalagyo ang suspek ugaling nadakpan sa follow up operation sang mga pulis.
Nahibaluan nga single mother ang biktima kag may duha ka bata samtang sultero naman ang suspek nga yara na napriso sa Leganes Police station kag nagapangatubang sang kaso nga rape.
