Ginikanan daku ang papel sa net use

Davao City – Gidepensahan karon sa Department of Education (DepEd-XI) ang mga batan-on nga nagyampungad diha sa mga internetan kumpara sa pagtan-aw sa telebisyon ug paghugoy-hugoy uban ang pamilya.

Wala sa kabataan ang sayop kon dili, anaa sa mga ginikanan kay sila mismo ang nagtugot nga mulampas sa limitasyon sa oras ug maabuso sa ilang mga anak ang internet, segun ni DepEd-XI Spokesperson Jenielito Atillo.

Busa, kun aduna ma’y angay basulon kana walay lain kon dili ang mga ginikanan ra kay ilang gipasagdan ang ilang mga anak nga patugaras diha sa mga gadgets ug wala’y disiplina sa pagbaton og saktong oras sa paggamit sa internet.


Gisaway ni Atillo ang mga ginikanan kinsa walay concern sa ilang mga anak nga bisan og lawom na sa kagabhion, atoa pa gihapon sa internetan.

Nagpasidaan si Atillo sa dad-on nga epekto sa internet abuse diha sa pagtoon ug pag-perform diha sa klase sa ilang mga anak nga kun dili masanta, hayan mawala gayod sila sa tul-id nga direksiyon sa kinabuhi.

Ang taas nga oras sa internet magpaguba usab sa kapasidad nga makigrelasyon ang mga kabataan ngadto sa ilang mga ginikanan ug sa sosyedad nga angay unta nga tutokan og maayo samtang linghod pa ang ilang edad.

Basin muabot ang panahon nga ulahi na unya ang tanan ug dili na kaya disiplinahon ang mga kabataan tungod sa internet abuse nga modaut sa dagan sa pangisip sa mga batan-on karon.

RadyoMaN Joel Viray

Facebook Comments