General Santos City—Nagpabilin pa sa pampublikong tambalanan sa Gensan ang tulo ka managsuon nga gituohang nahilo sa gikaong hotdog ug karne nga gipalit sa karenderya nga nahimutang sa Mabuhay Road, ning dakbayan.
Ginaobserbahan pa karon ang mga biktimang sila si Chrisly Elcarte, 10 anyos, Charlene Elcarte, 9 anyos ug Chrizel Elcarte, 2 anyos, ulos residenti sa Mirabueno Vill., Barangay Mabuhay, Gensan.
Una nang gikanayon sa uyuan niini nga si alyas Jing nga alas 7:00 ang takna sa gabie dihang nikaon sila sa gipalit nga hotdog ug sud-an, apan human sa pila ka oras, nakasinati nag panakit sa tiyan ug kalipong ang mga nasangpit.
Samtang bandang Alas 11:00 ang takna sa gabie dihang gipangdala na sa Dr. Jorge Royeca Hospital ang mga biktima human nga nagsige gihapon ug panakit ang ilang tyan ug nagsige na ug balik-balik sa ilang CR.
Walay laing gidudahan ang mga ginikanan sa bata nga hinungdan niini kon dili ang gikaon nga hotdog ug sud-an nga kerning baboy nga ilang napalit sa karenderya.
Sa karon gihuwat nalang ang resulta sa eksaminasyon sa tulo ka mga biktima aron masuta unsa gyud ang hinungdan sa gidangatan sa mga nahisgutan ayha sila muhimo ug legal nga aksyon batuk sa mga personahe sa karenderya.
