Pilason ang isa ka maestro sang Madison Grade School sa Simeon-Aguilar St. Poblacion Ilawod, Passi City matapos luthangon mga alas 9 kagab-i sang riding in tandem.
Ginkilala ang biktima nga si Nicanor Labo, 47 anyos sang barangay Aglalana, Passi city.
Ginpahayag ni Police Supt. Arturo Fullero, hepe sang Passi City PNP nga natabu ang insidente samtang nagatindug ang biktima sa guwa sang isa ka botika sa idalum sang ila eskuwelahan sang ginluthang ini sang duha ka suspek nga nagasakay sa motorsiklo.
Nakaagum sang tatlo ka pilas sa paa, tiyan kag abaga si Labo kabangdanan nga gindala ini sa Passi City District Hospital apang ginsaylo sa Iloilo Doctor’s Hospital.
Madasig naman nga nagpalagyo ang mga suspek kag padayon karon nga ginahibalo sang kapulisan ang ila identity kag kon ano ang motibo sang tuyo nga pagpatay kay Labo.
Sa karon yara na sa luwas nga kahimtangan ang biktima sa nasambit nga opsital.
Angut sini, ginapangabay ni Police Supt. Arturo Fullero sa sin-o man nga nakasaksi sa insidente nga mag-kooperar sa mga pulis agud madasig nga masolbar ang nasambit nga kaso.
