TACLOBAN CITY – Iginkahadlok ngan iginkabaraka han mga netizens dinhi ha Leyte an nakalat yana ha social media kun diin mayada ginpost ha facebook hi Joviel Salceda Bayron nga mayada daw nanmamatay hin tawo, nanrirape ngan nangangawat.
An siring ha mga comments tikang daw ha Alangalang Leyte ini nga tawo nga natuktok ha purtahan tapos gintitigbas iton mga biktima. Yana daw in aadto na ha Palo, Leyte ngan didto daw gihap ini nanmimiktima pa.
Umabot ha 3,500 an shares ngan 1659 nga comments an nasabi nga ginpost.
Kadam-an liwat nga netizens an gin-tag an RMN Tacloban hito nga post.
Sanglit dayon kami nga umaksyon hini nga nagin viral ha social media. Ha interview han RMN kan Alangalang PNP Chief Of Police PSInsp. Alexander Joaquin, waray kamatuuran ini nga panhadlok ha mga netizens ha social media.
“Hindi po yan totoo yang kumakalat sa facebook, kasi po kung totoo yan may mga reklamo na sana or report kaming natanggap na may namatay or may nasaksak dito sa Alangalang.”
“Sa mga tao, huwag po kayong magpapaniwala sa mga ganyan bagkos magtanong muna kayo sa amin or magreport.”
Nakipagsumpayan gihapon an RMN ha Palo PNP, sumala kan Palo Chief Of Police PCInsp. Joselito Villas, maiha na ito nga hurob-hurob pero waray ito kamatuuran.
“Maiha na ito nga issue, puros la ito kuan [panhadlok] kuntalos narirape nanmamatay,waray man ngani ito kamatuuran.”
“Mayada didi lugar ha Palo may nagreport nga mayada daw lalaki sugad gihapon hito nga issue, ginkadto han mga pulis waray man hiton. Ginhahadlok la it mga tawo pero waray ito kamatuuran.”
Kun ano iton iginpopost ha social media bisan waray kamatuuran o ebidensya, natuod dayon iton mga tawo. Sanglit pahimatngon han RMN ha mga netizens, ayaw pagpost ha social media kun diri sigurado kay posible igkapanic ini hiton publiko.
