Brutal nga ginpatay kag ginhimuslan ang 9-anyos nga bata nga babaye sa bahin sang Barangay Poblacion, T`boli,South Cotabato sang Miyerkules sang gab-i, Marso 7, 2018
Sa ila imbestigasyon suno kay Police Chief Inspector Ramil Villagracia naglisensya suno pa ang bata pasado alas 7:00 sang gab-i nga mag-cr kag gin-updan sang amay, apang tungod nagdeperensya ang videokehan ginbayaan sini ang bata.
Kumpyansa naman suno pa ang amay nga nakabalik na sa sulod sang balay ang bata, apang sang pagkaon nila wala niya nakit-an ang bata kag nagsalig man suno pa nga yara sa peryahan sang iya nga tiyo nga ginpromisahan sini ang bata nga pasakyon sa rides.
Apang sang ginkadtuan sang amay wala ini sa peryahan amo nga ginpangita nila ang bata, apang nasapwan na lang ang patay nga lawas sang bata kag may nakit-an nga nagalapta nga kasudlan nga parte sang lawas nga sa subong padayon pa nga ginaimbestigaran kon iya gid bala ka bata.
Tigayon naman nga nadakpan ang suspek nga ginkilala kay Sonny Natividad Kagalingan, 48-anyos, matapos nga tugma sa pahayag sang mga testigo ang nakit-an nga gintago sini nga bayo sa basurahan kag mga dugo nga nakit-an sa sulod sang balay nga ginaistaran subong man pipila ka mga ebidensya nga makatudlo sa suspek.
Ginkasubo naman ni T`boli Mayor Dibu Tuan ang nasambit nga insidente nga natabo sa kasagsagan sang selebrasyon sang Seslong Festival sang banwa amo nga ginmando nga sa sulod sang 24 oras resolberon ang nadangatan sang 9-anyos nga bata nga babaye.
