Bago City – Wala makaluwas ang ‘denial’ sang suspek sang pagpanglugos sa tatlo ka tuig nga bata matapos napamatud-an sang korte nga may ‘rape’ gid man nga natabo santo sa reklamo sang amay kag iloy sini.
Basi sa desisyon ni Bago Regional Trial Court Branch 62 Judge nga si Frances Guanzon nga ginpaguwa sang Hunyo 7, 2017, ‘guilty beyond reasonable doubt’ ang pamatbat sini kay Joseph Roquero sa diin napamatud-an ang pagpanglugos sa tatlo ka tuig nga bata basi sa medical findings ni Dr. Elvis Gonzales.
Basi sa record sang korte, Agosto 20, 2013 natabo ang insedente sang ginbiyaan sang mag-asawa ang ila bata sa ila nga balay sa paghinakop ni Roquero bangod may importante ini sila nga ginkadtuan.
Si Roquero ang ila man nga ginasaligan, bangod tatlo ka tuig naman nila ini nga tupad balay, kag sa ulihi ginpaistar na sang mag-asawa sa ila puluy-an sang nasunog ang balay sang suspek. Mga isa naman ka bulan kon tani ang istar ni Roquero upod ang iya lima ka tuig nga hinablos.
Indi makapati ang mag-asawa nga pasilabtan pa ni Roquero ang ila bata nga wala sang buot, bisan pa nga ginsapupo na nila ini sang nasunugan.
Indi makita sang korte ang rasun sang pagbinutig sang tatlo ka tuig nga bata sa hamtong sini nga paminsaron, sa padayon nga ‘denial’ ni Roquero nga wala sang rape nga natabo.
Si Roquero ang magatinir sa Muntinlupa sa sulod sang 40 anyos kag ginapabayad pa ini sang P50,000 nga moral damages.
