Report ni: Tita Jen Palomo Debaja
Nagatalangison ang isa ka iloy nga OFW sa Hong Kong matapos magpauli sa haya sang iya pinalangga nga bata. Nasapwan kahapon sang aga ang iya bata sa isa ka masiut nga lugar sa Brgy. Pangi, Davao City nga wala na sang kabuhi.
Sa panaysayon sang iloy, nadula ang iya bata nga si Cristine Angel Laquinario, 6 ka tuig sa compound sang Mt. Terrace Village, Matina Pangi, Davao City sang Setyembre 17, 2018.
Suno sa ulihi nga nakakita sa biktima, may nagdulog nga motor sa kilid sang bata kag gulpi ini nga ginpasakay.
Tungod wala makabalik ang iya anak, nagpangayo sang bulig ang pamilya sa kapulisan kag ginpalapta sang iloy sa social media ang litrato sang missing nga si Angel.
Apang sa malain nga palad, nasapwan ini sa isa ka masiut nga kanyugan kahapon sang aga Setyembre 23, 2018 nga wala na sang kabuhi kag yara na sa state of decomposition. Ginapatihan ginhimuslan anay sang suspek ang biktima, ginpatay kag ginsunog bag-o ihaboy sa lugar kon sa diin ini nakit-an.
Nakita man nga gingapos ang tiil kag kamot sang biktima samtang sunog na ang lawas. Gintabunan man sang binaluk-an sang niyog ang bata agud indi dayon makita.
Naga panawagan subong sang hustisya ang pamilya ni Angel samtang padayon nga gina imbistigahan sang kapulisan ang kaso.
Samtang yara na karon sa kustodiya sang Talomo Police Station ang suspek nga ginkilala kay Rico Jay Lauron Labao.
Sa panaysayon sang suspek tungod sa kahulugbon kag daw nadula na sa iya kaugalingon, natripan na nga himuon ang krimen.
