Patay ang manager sang flower farm sa Sitio Lemblisong, Brgy. Kablon, Tupi, South Cotabato, matapos nga ginluthang pasado alas 10:00 sang aga sang tinalikdan nga adlaw.
Ginkilala ang biktima kay Jeffrey Calanao, 31-anyos, kasado kag residente sang Isabela Homes sa General Santos City, manager sang Eden’s Flower Garden sa banwa sang Tupi.
Base sa imbestigasyon, halin ang biktima sa General Santos City padulong sa Eden’s Farm, sakay sa iya nga salakyan nga Isuzu pick-up, color maroon nga may plaka LDN 155 sang ginluthang sang wala nakilal-an nga mga suspestado.
Nakaangkon naman sang igo sang bala sa ulo kag tiil ang biktima nga nangin rason sang hinali sini nga kamatayon.
Narekober naman sa salakyan sang biktima ang relo, wallet kag cellphone sini kag tigayon man nga ginturn-over sa iya nga asawa.
Ginapatihan nga personal grudge naman ang motibo sa pagluthang patay sa biktima.
Sa subong, padayon sa gihapon ang imbestigasyon sang Tupi MPS sa nasambit nga insidente.
