Cuartero, Capiz – Patay na sang masapwan ang 18-anyos nga soltero mga alas otso sang aga sa sulod sang poluy-an sa Brgy Balingasag, Cuartero, Capiz.
Ang biktima ang ginkilala kay Aljohn Apoldo y Agustin, residente sang nasambitan nga lugar kun sa diin nasapwan sang tiyo sini nga barangay kagawad nga si Roger Agustin ang bangkay sang amo nga biktima sa kusina nga porsyon sang poluy-an.
Suno kay Police Master Sargeant Juan Agupitan Jr., base sa ila inisyal nga imbestigasyon ginpilit painum sang suspek nga si Reggie Agustin y Guillermo ang amu nga biktima gamit ang ginhalo nga likido halin sa langgaw, tuyo, asin, badyawan, dulaw, kalamansi kag gata sang lubi.
Ini amo ang sangkap nga ginsiling sang mediko nga ginkunsoltahan angut sa ginabatyag nga balatian sang biktima nga kuno ginyanggaw sang aswang.
Samtang sang ginpadulongan sang news team ang pamilya sang biktima, ginkumpirmar sang tiyo sini nga si Joseph Apoldo nga nagasuprer sang depression ang iya gumangkon.
Ginsiling sini nga na- confine sa Capiz Emmanuel Hospital ang iya nga gumangkon sang bulan sang Setyembre bangud sa kalain sang buot nga nabatyagan makaligad ang sunod- sunod nga pagkapatay sang amay sini sang Enero 2019 kag amay sang nakaligad nga Hulyo 2019.
Pagkatapos nga makaguha sa ospital, imbes nga sa tiyo nga si Joseph Apoldo, didto sa isa pa gid sini nga tiyo nga si Roger Agustin nag-istar ang amu nga biktima.
Hugot ang pagpati sang pamilya Apoldo nga ang gin-inum sini nga nga likido amu ang kabangdanan sang kamatayon ni Aljohn Apoldo kabangdanan nga ila ginpaidalom sa otopsiya ang bangkay sang biktima.
