NAHATAG na ngadto sa gatusan ka mga residente ning siyudad ang ilang gipaabot nga kulang sweldo subay sa programa sa Department of Environment and Natural Resources (DENR) XI nga pagpanghinlo sa mga kabaybayonan.
Sa pagpanubay sa programang *Serbisyong Straight to The Point*, gikalipay sa Davao City Environment and Natural Resources Office kun Davao CENRO nga ang gipaabot nga 2,000 pesos nga kulang sweldo sa daghang mga residente ning dakbayan, na-*release *na gayud niadtong Lunes, Pebrero 20.
Kahinumduman nga usaka concerned citizen sa Barangay Talomo ning dakbayan ang nagpadangat sa iyang reklamo sa DXDC gumikan kay gisaaran kuno sila sa DENR XI pinaagi sa ilang barangay nga sweldohan sila og 4,000 pesos alang sa *coastal clean-up program* sa gobyerno. Apan sa dugay kuno nilang pinaabot, wa pa gyud matunol ang sweldo ug gibati na sila og kabalaka nga basin wa na silay lauman pa nga dugang dos mil.
Gipasabot sa DENR nga nadugay ang paghatag sa sweldo gumikan kay kulang man ang mga dokumento nga gihatag sa mga trabahante. Dugang pa sa buhatan nga nanginahanglan gayud sila og kumpletong dokumento ilabi pa nga pundo sa gobyerno ang ilang gigunitan. Laing rason usab kung nganong nalangan ang sweldo gumikan kay wa magkadimao ang gitunol nga rekord sa oras sa pagtrabaho sa anaa sa listahan.
Sa pikas bahin, nagpasalamat ang buhatan sa CENRO nga gihatagan sila og igong panahon aron ipadayag ang ilang eksplenasyon kung nganong nalangay ang paghatag sa sweldo sa mga gipatrabaho sa coastal clean-up sa mga barangay ning siyudad.
Report ni RadyoMaN Misel Miral
tag: dxdc 621 davao
