General Santos City–Mukabat ngadto sa P216,633.79 ang kantidad sa produkto nga gilangkuban ug mga electrical supply ug appliances ang gipangguba sa mga personahe sa DTI Regional Office-12 pinaagi sa usa ka heavy equipment nga gipahigayon sa sanitary landfill nga nahimutang sa barangay Sinawal, Gensan alas 10:00 kaganinang buntag.
Atol sa maong aktibidad anaa usab ang mga representanti gikan sa Commission on Audit (COA).
Sa giluwatang pamahayag ni Mary Ann Morales, Division Chief sa Consumer Protection sa DTI-12 gibutyag niini nga wala miagi sa Philippines Standard Mark ang maong mga produkto susama nalang sa fluorescent lamp, outlet, extension cords, lighters, snap switches, ceiling fan, flat iron, desk fan, stand fan, rice cooker, DVD ug led TV.
Ang nasampit nga mga produkto ang nag-gikan sa WWA enterprises, Unitop General Merchandise ug RD hardware and Fishing Supply nga nakumpiska niadto panbg tuig 2016. (Ray Sabillo)
