General Santos City–Mukabat sa 3 milyones ka pesos ang kantidad sa mga produkto nga gikan sa nagkadaiyang nasud ang gipanglabay sa sanitary landfill sa Brgy.Sinawal human nga gi- abandona sa mga nanag-iya niini.
Pagpaklaro ni Elenita Abaño ang port collector sa Bureau Of Custom-Gensan nga niadtong tuig 2013 pa nilang naharang ang 23 ka mga containers nga dunay sulod nga mga nagkalain-laing produkto nga walay igong mga dokumento.
Napulo niini ang wala matud pa gi-aprobahan sa district collectors office sa Port of Davao pinaagi ni Atty. Austria gumikan sa kuwestiyonable nga mga kargamento nga gilangkuban sa ukay-ukay, coconut sugar, candies, assorted tires ingon man edible palm oil ug uban pa.
Dugang pamahayag ni Port Collector Abaño nga miagi sa tamang proseso ang pagkumpiska sa mga produkto nga gikonsidera nilang gi-abandona na sa mga hintungdan.
matud pa sa opisyal nga ayha pa nila gidesisyonan nga ipanglabay na ang mga produkto sa maong landfill ilaha pang giimbetahan ang pipila ka mga ahensiya sa gobyerno aron mosaksi sa maong aktibidad.
Gitambongan kini sa hut-ong sa mga media sa Gensan, mga opisyal sa Philippine Ports Authority, Philippine Coconut Authority ingon man ang Solid Waste Management Unit ug uban pa.
Sumala pa ni Elenita Abaño nga pulos mga imported nga produkto nga ilang gipanglabay nga walay import permit ug walay mga igong dokumento ug saysay pa niini nga gipadal-an na usab kini ug request sa mga mi-aging port collector alang sa disposal sa mga kargamento.
Gihingusgan sa opisyal nga dili siya magduha-duha nga ipatuman kung unsa ang anaa sa balaod ilabi na kadtong mga kargamento nga moabot sa buhatan sa Bureau Of Custom nga walay saktong mga papeles. kahibaloan ang alas 10:00 sa buntag niadtong adlaw’ng Biyernes gipahigayon ang disposal sa mga imported nga produkto sa sanitary landfill sa Sinawal, Gensan. (Reynald Timario)
