South Cotabato—Patay ang 6 anyos ug 4-anyos nga magsuon human nga gidunggab sa ilang kaugalingong amahan ayha naghikog sulod mismo sa ilang panimalay didto sa Purok 3, Barangay Dumadalig, Tantangan, South Cotabato.
Subay sa report sa Tantangan PNP nasayran nga gidunggab sa amahan nga si Willy Enables, 30, ang iyang duha ka anak ayha kini naghikog pinaagi sa pagbitay sa iyang kaugalingon.
Alas 7:00 kaganinang buntag dihang nadiskobrehan nalang sa ilang apohan ang duha ka bata nga wala nay kinabuhi samtang nakaplagan usab si Willy nga nagbitay na.
Nasayran nga ayha nahitabo ang insidenti, gikuha sa supek ang iyang mga anak sa balay sa iyang inahan ug gidala sa ilang balay. Didto na niini gihimo ang pagdunggab sa iyang mga anak.
Usa sa mga gitan-aw nga motibo sa kapulisan mao ang selos human nga anaa sa kauluhang Manila ang iyang asawa aron unta magtrabaho sa nasud Dubai.
