General Santos City–Blangko pa ang kabanay sa biktimang si Jok Omar Veloso, 50 anyos, sikad driver nga taga barangay Dalyao, Maasim, Sarangani Province kansa gipusil sa wala pa mailhing suspek gawas lang sa ilang pinuy-anan alas 7:30 ang takna kagabie, May 7, 2018.
Sumala sa asawa sa biktima nga bag-uhay lang gyud niabot sa ilang balay ang iyang bana sakay sa ilang traysikad dihang kini gipusil sa wala mailhing suspek.
Tulo ka mga samad pinusilan ang naangkon sa biktima sa iyang likod nga bahin nga milapos sa iyang tiyan. Paspas sab nga misibat ang suspek sa wala masayring lugar human sa pagpamusil.
Gibutyag usab sa ginang nga wala pa sila masayod unsay motibo sa pagpamusil ug bisan na sa suspek sa krimen gumikan wala may nasulti kaniya ang iyang bana nga dunay nagbahad sa iyang kinabuhi.
Wala man usab kalaban ug atraso sa ilang lugar ang nasangpit nga biktima. Hinuon sa kasamtangan nagpadayon ang gihimong imbistigasyon sa Maasim Municipal Police Station kalabutan sa insidenti.
