General Santos City – Nagpadayon pa ang gihimong imbistigasyon sa Sarangani Police office kalabutan sa nahitabong pagpangsunog sa mga armadong lalaki sa mukabat 3 ka mga ekwipo nga iyaha sa Gemma Construction sa may Sitio Balagon, Brgy. Tuanadatu, Maitum, Sarangani Province niadtong nakalabayng adlaw.
Una nang nakadawat ug report ang Maitum Municipal Police Station gikan sa mga residenti nga matud pa adunay gisunog nga mga heavy equipment sa maong lugar mao nga gilayong girespondihan sa kapulisan.
Didto nakit-an ang tulo ka mga ekwepo nga nasunog nga nagkantidad sa kinatibuk-an ug P7,000,000.00.
Subay sa inisyal nga imbistigasyon sa Maitum PNP nga ayha pa nahitabo ang pagkasunog sa mga himan aduna nay report nga nadawat ang kapulisan nga adunay presensya sa armado sa lugar.
Samtang giangkon sab sa management sa Gemma Construction nga aduna silay nadawat nga extortion letter gikan sa mga rebeldi hain sila gipangayuan ug revolutionary tax sa mga nasangpit.
Tungod niini gituohan sa kapulisan nga tungod sa pagmagahi sa kumpanya sa paghatag sa gipangayo sa armadong grupo maoy hinungdan nga ang mga himan maoy gipahimuntansa armadong grupo.
