Davao City – Usa sa mga gituohang lider sa New People’s Army kun NPA ang nasikop sa kasundaluhan sa gilusad nga checkpoint sa Brgy. Sonlon, Asuncion, Davao Del Norte.
Sa report nga gihimo ni BGen. Erwin Bernard Neri, Commander sa 1001st Infantry Brigade Phil. Army, sa initial nga debriefing, gibutyag sa nadakpang teroristang NPA nga apil sya sa mga na-engkwentro sa kasundaluhan.
Kahinumduman nga miulbo ang sunod-sunod nga engkwentro sa Davao Del Norte ug Compostela Valley nga miresulta sa pagkamatay sa usa ka sundalo nga si Pfc. Arman C Campos ug duha usab ka sundalo ang samdan Pfc. Ruben L. Lambac, Jr. ug Pfc. Ralph Ryan B. Paldomar.
Naengkwentro sa 60th Infantry Battalion ang wala matinong ihap sa NPA sa Lower Dalimdim, Naga, Laak, Compostela Valley alas 3:30 sa hapon samtang pipila ka minuto lang, naengkwentro usab sa 71st Infantry Battalion ang mga sakop sa NPA sa Sitio Rizal, Camadi District, Asuncion, Davao Del Norte samtang alas 4:30 sa hapon laing engkwentro na usab ang miulbo tali 46th IB troopers ug NPA kinsa ang 46TH IB naglusad og pursuit operation niadtong tungora sa Sonlon, Asuncion, Davao del Norte.
Sa impormasyon, nakuha sa kasundaluhan ang upat ka Ak47, usa ka grenade launcher, usa ka M653, usa ka M14, upat ka M16 ug usa ka unexploded Improvised Explosive Device (IED).
Panawagan ni Neri ngadto sa katawhan sa Comval ug Davao del Norte nga magpadayon sa pakig-koordinar sa kasundaluhan ug pagtrabaho sa pagkab-ot sa kalinaw sa komunidad ingon man awhagon ang pikas pundok nga mubalik sa sabakan sa gobyerno og manimuyo og hapsay nga kinabuhi.
RadyoMaN Renz Barbarona
