iFM — Maipaayan manen ni Gobernador Imee Marcos ti pammadayaw ita nga aldaw Abril 24 idiay Waterfront Hotel, Cebu City.
Daytoy ket ti 2019 “Gawad Parangal for Outstanding Governor for Social Welfare and Development.”
Maysa manen daytoy a pammaneknek iti kinapinget ti tarigagay ti gobernador a mangisaknap ti naan-anay a panagdur-as ti probinsia ti Ilocos Norte.
Daytoy a pammadayaw ket ipaay ti Association of Local Social Welfare and Development Officers of the Philippines Inc. (ALSWDOPI).
Binigbig ti organisasyon dagiti provincial, municipal, ken city social welfare and development officers iti intero a pagilian wenno ALSWDOPI ti kinalaing, kinasirib ken ti umiso a panangipatungpal ti gobernador ti social ken development programs, proyekto ken aktibidad ditoy probinsia a pagsayaatan dagiti umili.
Malagip nga ti umuna a terminona idi tawen 2010, napinget ti kalikagumna a manglaban iti kinakurapay ditoy probinsia rason nga inyuswatna ti Paspas Dur-as a dakkel ti naitulongna iti panagdur-as ti benneg ti agrikultura, nabuangay dagiti naruay a pagtrabahoan, napasayaat dagiti programa mainaig iti salun-at, napasayaat dagiti proyekto infrastraktura ken nangnangruna unay ti tulong dagiti nataengan ken masaksakit.
Nakabaelan ti gobernador nga inpababa ti unemployment rate manipud iti 37 a porsiento idi 2010 ket nagbalin laengen a 7.3 a porsiento itay napalabas a tawen 2018.
Bernard Ver, RMN News
