Davao City- Dala sa kausaban ug moderno nga panahon dungan usab ang pag-utro sa batasan sa tawo nga kung sa una kugihan magbaktas apan karon tanan gusto na magsakay ug wala na’y gusto maglakaw.
Gumikan sa pagdaghan sa mga surplus ug secondhand nga mga sakyanan bisan pobre dali ra makabaton niini tungod kaya ra kaayo sa bulsa ang kantidad sa bihikulo.
Busa alang ni Pastor Albert Alang kinsa buot sab magpalit og depasayruan mao kini ang rason sa pagdaghan sa mga bihikulo nga nagresulta sa kaguot sa dagan sa trapiko sa atong dapit.
Ang pagbuhol-buhol sa trapiko sa atong mga kadalanan tungod usab kini sa mga drivers nga kuwang sa disiplina ug pagbaliwala sa pagsunod sa mga balaod trapiko.
Masulbad lamang ang suliran sa trapiko kung aksyonan ug solusyonan gilayon sa mga ahensiya sa gobyerno nga gitahasan sa dagan sa trapiko kasiyudaran ug kalungsuran, dugang ni Alang.
Kung dili magpanday og palisiya ang gobyerno sa paglimitar sa kagawasan sa mga tawo gikan sa pagpalit og bihikulo magpabilin nga labad sa ulo ug hasol ang kaguot sa trapiko.
Hangtud dili sab butangan og ngipon sa mga traffic enforcers ang pag-imposar sa mga balaod trapiko na dili usab makalaum ang kadaghanan sa hahuray nga dagan sa trapiko sa atong kadalanan.
Sanglit pribelehiyo raman ang pagbaton og bihikulo tungod dili tanan dunay sapi, angay lang pod unta nga disiplinado ang mga tag-iya og mga sakyanan sa pagtuman sa mga balaod trapiko alang sa tunhay ug haruhay nga dagan sa trapiko sa atong kadalanan.
RadyoMan Joel Viray
