Sarangani Province–God centered governance matud pa ang mamahimong target karon ni Gov. Steve Chiongbian Solon sa iyahang uwahing termino isip amahan sa probinsya sa Sarangani aron nga mas mapasaka pa ang kahimtang sa katawhang Sarangan.
Sumala pa ni Governor Solon nga mag sentro sa mga pamilya ang ilahang pag dumala karon kung diin target nila nga mamahimong God centered ang tanan nila nga pagabuhaton pinaagi sa tagsa-tagsa ka pamilya sa Sarangani Province.
Samtang gikabutyag man usab niini nga sa una niini nga mga adlaw sa paglingkod sa iyahang uwahing termino motutok matud pa kini sa infrastructure project hilabi na ang pagbutang ug dalan sa kabukiran.
Ayha matud pa mahuman ang iyahang termino gikinahanglan nga maabrihan na ang mga kabukiran sa Sarangani nga kaniadto dili pa maabot ug sakyanan, kini matud pa ang ilahang gilatag sa office of the president sa dihang nakigpulong kanila ang usa ka Under Secretary.
Pinaagi matud pa sa pag-abri sa kabukiran musunod na ang edukasyon tungod kay accessible naman kini ug mas mutaas usab ang upland tourism sa mga lugar nga maadtuan na ug mga sakyanan. (Dave Silagan)
