Sibutad, ZDN-Gipailawom na karon sa autopsiya ang patayng lawas nga napalgan niadtong adlawng Domingo mga 3:00PM partikular sa may Purok 1, Brgy. Minlasag, sakop sa lungsod sa Sibutad, ZDN.
Ang naka kita sa maong kalabira mismi si Justo T. Ontolan kinsa niadtong higayona nangita kini ug Sappo Tree alang sa iyang paghimo ug Christmas Tree, apan dako ang iyang kakuyaw sa dihang misugat sa iyang panan-aw ang mga bukog sa tawo.
Base sa imbistigasyon sa kapulisan sa Sibutad ang maong kalabira naghay-ad kini sa banig nga hinimo gikan sa dahon sa lubi. Ang maong patayng lawas nagsuot kini sa dalag nga sweatshirt ug camouflage nga short. Nakuha sa position sa patayng lawas ang cellphone nga Sonny Erikson, relo nga Seiko diver, ug gamay nga botelya nga may sulod kining papel ug may nakasulat nga latin.
Sa dugang pagpakisayod sa PNP Sibutad naila ang maong patayng lawas nga iya ni Totong Ronquillo, nagpangidaron 38-45, usa ka treasure hunter ug gituohan nga nagpuyo sa Pagadian City.
Base usab sa testimonya sa iyang kauban sa trabaho, nga halos 5 ka bulan kining nawala ug gituohan nga adunay usab kini deperensya sa panghuna-huna.
Sa pagkakaron nagpaabot nalang sa resulta sa autopsiya nga gihimo sa SOCO aron masayran ang tinuod nga hinungdan sa kamatayon sa biktima.
