Sarangani Province–Gikonsidera sa kadaghanan nga “Golden Months” sa Sarangani Province ang ikaupat og katapusang quarter karong tuiga 2018. Golden Months nagpasabot nga labing daghan ang mga kaayuhan nga nangabot og gakahitabo sa probinsya atong bulan sa Oktubre, Nobyembre og Disyembre.
Sa atong Year-End Review sa 4th Quarter, pormal nang gitunol ang award ngadto kang Governor Steve Chiongbian Solon nag-ila sa Sarangani isip Rank 5 Most Competitive Province sa tibuok Pilipinas taliwala nga adunay kapin otsyenta (80+) kabuok probinsya. Tungod sa maong award, gawas sa national ranking, giila na karon ang Sarangani nga Number 2 Most Competitive Province sa entiro Mindanao.
Nasulod pud sa Top 10 Most Outstanding Provincial Jail sa entiro nasud ang Sarangani Provincial Jail timaan nga nindot ang pagdumala sa Provincial Government sa Sarangani ngadto sa mga binilanggo.
Gihimo usab nga national model ang Sarangani Province sa tibuok nasud sa hisgutanang LGU program aron labanan ang terorismo. Segun ni DILG Assistant Secretary Alexander Macario nga usa ka retired brigadier general, nag-una ang Sarangani sa pag-implementa og mga inisyatibo ilalum sa Sulong Kapayapaan program may kabahin sa anti-violent extremism. “Inclusive” matud pa ang gipatuman nga programa ni Governor Solon, “whole of nation approach” nga wala ra nakatutok og may koordinasyon sa usa ka grupo kundili sa halos tanang sektor sa mga tao, og namugna kini nga programa tulo (3) katuig na ang nakalabay wala pa nagkasamok sa Marawi City.
