Sarangani Province—Nanawagan si Sarangani Governor Steve Chiongbian Solon nga pahimuslan sa mga taga-Sarangani Province ang gitanyag nga tax amnesty sa Provincial Government ngadto sa may obligasyon pa sa ilang real property tax.
Kadtong adunay mga yuta, balay, gambalay og mga makinarya, ma-indibidwal man, kahugpungan og korporasyon, nga may balayrunon pa sa ilang buluhisan, ang pwede pang muduol sa ilang Municipal Treasurer’s Office o dili ba kaha sa Provincial Treasurer’s Office hangtud na lang Setyembre 30 karong katapusan sa bulan.
Wala nay pagabayaran sa interest, bayaran lang ang principal amount. Pwede pang bayaran nga installment hangtud mahuman ang tax amnesty karong bulana.
Segun ni Governor Solon, gituyo kini nila nga programa aron matagaan og higayon kadtong R.P.T. delinquent taxpayers nga makunhuran ang ilang pagabayran sa lokal nga gobyerno, hilabi na kadtong mga mag-uuma nga grabeng na-apektuhan sa kainit hatud sa El Niño phenomenon niaging katuigan.
Lisod matud pa nga pugaon sa probinsya ang uyamot nga taxpayer nga wala dayoy ikabayad, maong gitanyag ang maong tax amnesty. Ang minilyong buhis nga makolekta ang sigurado matud pa nga dakog ikatabang sa daghang programa og proyekto nga ginapatuman karon sa Sulong Sarangani development flagship program ni Governor Solon.
