Davao City – Nagpahimangno ang Local Government Unit (LGU) sa Davao de Oro nga dakpon na ang mga masinupakon sa ‘measures’ nga ginapatuman sa probinsya batok Coronavirus Disease 2019 (COVID-19).
Sa interbyu sa DXDC RMN Davao kang Davao de Oro Governor Jayvee Tyron L. Uy, gibutyag niini nga gipulong na niini ang mga ‘local enforcement agencies’ sa probinsya nga arestohon ang mga dili musunod sa ‘measures’ pagpugong sa pagkatag sa virus.
“Naa poy mga pipila ka buyagonon, mga katawhan nato nga dili gihapon kasabot. Nag istorya na mi sa mga law enforcement agencies nato. Warningan ta mo, dakpon na gyud mo kay dili pwede ma-compromise ang health situation nato,” pahimangno ni Uy.
Na-obserbahan sa gobernador nga aduna gihapoy mga taga Davao de Oro nga wala nagatuman sa ‘basic protocols’ sama sa pagsuot og face mask kung mugawas sa balay ug pag obserba sa social distancing.
Gitataw sa opisyal nga kontrolado man ang sitwasyon apan angay gihapong dili mo-kumpyansa labi na nga nagkataas ang kaso sa COVID-19 sa probinsya.
RadyoMaN Kirby Manzon
