Gov. Zubiri, mipatawag ug emergency meeting sa Provincial-IATF

23

Mipatawag ug emergency meeting si Bukidnon Provincial Governor Jose Ma. R. Zubiri, Jr. ngadto sa mga membro sa COVID-19 Provincial Inter-Agency Task Force aron hisgutang ang kasamtangang updates dinhi sa atong probinsya sa maong virus didto sa Kaamulan Folk Arts Theater, Kaamulan Park, Malaybalay City dili pa lamang dugay.

Lakip nga giimbitar sa maong meeting ang mga mayores sa 20 ka lungsod ug 2 ka syudad, Provincial Health Officers, mga City/Municipal Health Officers, Bukidnon Provincial Police Office, Philippine Army, Chief of Hospitals sa 8 ka Bukidnon Provincial Hospitals ug mga Heads of Office sa Provincial Government of Bukidnon.

Sa maong meeting, naghatag ug updates si Dr. Gary Guido C. Tabios, Jr.-Medical Officer III, OIC Provincial Health Officer sa Bukidnon diin gibutyag niini nga sa kasamtangan sa pagsulat ning balita, aduna na’y mokabat ngadto sa 380 ka mga kaso sa probinsya sa Bukidnon ang natakbuyan sa COVID-19 diin 199 niini nga kaso ang natala gikan sa Locally Stranded Individuals o LSI’s ug Returning Overseas Filipino Workers o ROF’s ug 181 niini ang local cases. Miabot usab ngadto sa 251 ang nakarekober o naayo sa maong virus diin 129 ang active cases sa kasamtangan ug 6 ang natala nga namatay.

Sa maong ihap sa kaso sa COVID-19, nag-una ang mga dagkong syudad sama sa dakbayan sa Malaybalay ug Valencia ug ang munisipyo sa Manolo Fortich nga maoy pinakadaghang kaso nga natala sa maong virus.

Mihatag usab ug update si Dr. Miguel Antonio Prantilla, Chief of Hospital sa Bukidnon Provincial Medical Center o BPMC ug gibutyag niini nga sa kasamtangan, adunay 29 ka mga COVID related case ang natala sa ilang buhatan diin 4 niini ang kompirmadong positibo sa COVID-19 ug 25 niini ang nagpaabot pa sa resulta sa RT-PCR. Mokabat usab ngadto sa 12 ka mga personahi sa BPMC nga ilang natala lakip na niini ang 2 ka doctor, mga nurses ug attending staff.

Gidasig usab ni Gov. Zubiri ang tanang mga mayores nga seryosohon ang problema sa maong pandemya ug karon ang hustong panahon nga ipakita ang ilang pagkatinuod nga leader sa ilang tagsa-tagsa ka munisipyo ug syudad.

Gihangyo usab niini nga mogahin ug panahon nga mobisita ug mosuroy sa ilang tagsa-tagsa ka lungsod aron makita ang tinuod nga sitwasyon sa ilang katawhan.




Gidugang usab niini nga sa pagkakaron, kinahanglan ang matinud-anon nga pag-ampo aron masumpo kining maong pandemya.

Facebook Comments