Government employee, gipusil-patay sa Panabo City

Gipanaad sa panggamhanan sa Panabo City nga maningkamot sila aron makab-ot ang hustisya sa kamatayon sa usa ka iladong public servant sa ilang komunidad human kining brutal nga gipusil-patay sa Purok Marang, Barangay Cagangohan, Panabo City, Davao del Norte niadtong December 7, 2024.

Sa report gikan sa Police Regional Office (PRO) XI nga gipadala sa DXDC RMN Davao, giila ang biktima nga si Karen Diana Candilosas, empleyado sa Bureau of Fisheries and Aquatic Resources (BFAR) XI.
Sa inisyal nga imbestigasyon, samtang anaa sulod sa sakyanan ang biktima, kalit adunay lalaking miduol og namusil igo sa ulo niini sa makadaghang higayon hinungdan sa iyang hinanaling kamatayon.

Gikasubo kini sa LGU Panabo ingon man sa mga opisinang gidumalaan usab niini hinungdan nga hugot ang baruganan sa lokal nga panggamhanan nga dili sila muundang og pakig-alayon sa otoridad aron madakpan ang suspect ug masayran ang motibo sa krimen.

Nagpaabot na sab og pahasubo ang BFAR National Mariculture Center ngadto sa pamilya ni Candilosas ug nakighiusa sa pagpanawagan og hustisya.

RadyoMaN Ivy Parido