Dipolog City-Giandam karon sa Zamboanga del Norte Electric Cooperative kun ZANECO ang kaso nga ipasaka niini batok ni Governor Roberto Y. Uy, duha ka pulis ug sa hepe sa Provincial Environment Management Office kun PEMO nga si Levy Lagutin Jr. tungod sa pagpangdakop niini sa ekipo sa kooperatiba nga nagpahigayon ug clearing operation sa linya sa kuryente.
Kahibaloan nga gidakop sa duha ka pulis sa Dipolog City Police Office ang crane ug usa ka Isuzu truck didto sa Barangay Tabon, Lungsod sa Jose Dalman niadtong milabayng Septiyembre 22 .
Giila ang duha ka pulis nga si PO2 Junrhel Moriones Caspiz ug PO2 Arnel Malanog Cabales kinsa gikatahong mga escorts sa gobernador. Matud sa mga nakakita, si Caspiz ug Cabales minaog gikan convoy sa gobernador.
Kahinumduman nga niadtong Agosto 8, gidakop usab sa usa ka pulis escort ni Governor Uy ang duha ka mga chainsaw nga gipanag-iyahan sa ZANECO ug ang pinutol nga mga kahoy didto sa Barangay Don Jose Aguirre, Lungsod sa Manukan.
Sa duha ka pagpangdakop, maoy girason sa mga pulis ug mga empleyado sa PEMO nga gipangulohan ni Lagutin nga walay napakitang permit ang mga trabahante sa ZANECO.
Apan ang management sa ZANECO miingon nga usa na ka pagpang-sabotahe sa operasyon sa kooperatiba paghatag ug insakto nga kuryente ngadto sa mga konsumante tungod kay gidakop man gihapon kini bisan sa gihuptan niini nga “permit to cut trees” nga gilugway sa Regional Office 9 sa Department of Environment and Natural Resources kun DENR.
Ang pagpamutol sa kahoy anaa lamang sulod sa “right of way” nga giagian sa mga poste sa kuryente. Gipaspasan karon sa ZANECO ang paghakot sa mga pinutol nga kahoy ngadto sa mga “identified areas” diin pagahimuon sa PENRO ang imbentaryo niini.
Usa ka trabahante sa ZANECO ang miingon nga wala gaapas ang kooperatiba sa mga pinutol nga kahoy tungod kay gisitar man sa “permit to cut trees” nga i-turnover ang mga pinutol nga kahoy human sa imbentaryo.
Ang gidakop nga crane ug Isuzo truck sa ZANECO gidala ngadto sa kwerpo sa kapolisan sa Jose Dalman, apan wala kini gi-custody sa kapolisan sa maong lungsod tungod kay ang DENR maoy adunay katungod nga modakop sa maong mga ekipo.
Pagka-hapon human kini gidakop, nahiabot sa Jose Dalman Police Office ang mga tinugyanan sa DENR ug gi-release ang crane ug Isuzu truck sa ZANECO.
Niadtong Agosto 8, gi-release usab sa DENR ang gidakop nga mga chainsaws apan gihakot gihapon sa mga trabahante sa probinsiya ang pinutol nga mga kahoy, ug wala na mahibaloi ug asa kini gidala.
