Ginapaalerto ni South Cotabato Governor Daisy Avance Fuentes ang tanan nga mga pumuluyo dire sa probinsya tungod sa natabo nga duha ka insidente sang pagsigabong sang improvised explosive device (IED) sa banwa sang Isulan, Sultan Kudarat.
Suno kay Governor Fuentes dapat mangin mag-aligmat ang tanan kag mangin vigilante ilabi na sa mga makaduluda nga butang kag tawo tungod kon magamo ukon may insidente sang pagpasigabong maapektuhan gid ang turismo sang lugar kag kaiping nga probinsya.
Indi man suno pa dapat magkumpiyansa bangud ginatarget sang mga terorista ang mga lugar nga wala ginalauman sang mga tawo nga tamnan sang IED.
May-angot sini, ginmando niya nga pahugtan man ang seguridad sa provincial capitol nga kon may ibilin nga pagkabutang ang indi gid magkumpyansa.
Samtang, nagapati man ang gobernadora nga ang posible may kahimuan sang pagpasigabong amo ang mga nagapamatok sa bag-o lang ginlagdaan nga Bangsamoro Organic Law.
