Ginmando niya suno kay South Cotabato Governor Reynaldo Tamayo Jr., ang pagpabakod pa gid sang seguridad, pagpatigayon sang inspeksyon sa mga dalaw kag regular na nga pagpaidalom sa drug test sa mga inmates sa Rehabilitation and Detention Center.
Ang nasambit nga mando sang gobernador ang kadungan sang pagpositibo sang 58 ka mga inmates lakip na ang ila nga presidente sa ginpatigayon nga random drug test kag pagkumpiskar sang tatlo ka sachet sang shabu sang nagligad nga semana.
Ginpahayag niya man nga ginakonsiderar niya ang pagturn-over sa Provincial Jail sa BJMP nga una na ini nga gintun-an sang nagligad nga administrasyon.
Apang sa subong suno kay Governor Tamayo tutukan niya anay nga matama ang sistema sa pagpadalagan sang Provincial Jail kag mangin drug free.
Suno sa iya ini man ang rason kon ngaa may mga tawo siya nga ginkakas sa Provincial Jail lakip na ang warden tungod nagaggwa ang pangalan sang mga ini sa intelligence report.
