Governor Tamayo ginsiguro nga tutukan ang paghatag sang serbisyo partikular na edukasyon sa mga malagyo nga komunidad sa South Cotabato.

Ginsiguro ni South Cotabato Governor Reynaldo Tamayo Jr., nga mapalab-ot ang serbisyo sang gobyerno sa mga malagyo nga lugar ukon mga sitios sa probinsya partikular na sa Brgy. Ned, Lake Sebu nga isa sa ila suno pa nga ginhisgutan sa ginpatigayon nga pagsinapol sang Regional Task Force to End Local Communist Armed Conflict sang tinalikdan nga adlaw.
Ini matapos nga ginrekomendar sang nagsurender nga isa ka miyembro sang NPA nga si Alyas Joe, ang area coordinator ukon organizer sang MISFI kag CLANS dire sa probinsya sang South Cotabato nga buligan ang mga kabataan sa mga malagyo nga lugar sa probinsya paagi sa paghatag sang tama nga edukasyon.
Suno sa gobernador nauna na niya nga napalab-ot sa taglikom sang Technical Education and Skills Development Authority ukon TESDA nga indi mangin selective ang implementasyon sang mga programa sang ahensya kundi bilog na lang nga probinsya ang hatagan.
Plano niya man suno kay Governor Tamayo nga makig-istorya sa Schools Division Supt. sang South Cotabato kag kay Dep. Ed. Regional Director 12 Dr. Allan Farnazo nga magpatukod sang eskwelahan sa mga malagyo nga lugar sa probinsya nga nabudlayan na panaug ang mga estudyante.
Ginpahayag man sang opisyal nga hingyuon niya sa tanan nga ahensya sang gobyerno nga mag-isa sa paghulag sa pag-address sang problema sang katawhan matapos nga base sa executive order no. 70 ukon ang whole of the nation approach ni Presidente Rodrigo Duterte nga ginaobliga ang tanan nga departmento sang gobyerno nga manaug sa komunidad.

Facebook Comments